ՀՀ կրթության և գիտության նախարար Արմեն Աշոտյանն այսօր մասնակցել է Վենետիկի հանձնաժողովի (Ժողովրդավարություն օրենքի միջոցով եվրոպական հանձնաժողով) և Երևանի Վ. Բրյուսովի անվան լեզվահասարակագիտական համալսարանի Հեռանկարային ուսումնասիրությունների և նախաձեռնությունների կենտրոնի կողմից համատեղ կազմակերպած «Սահմանադրական գործընթացների ազդեցությունը հետկոմունիստական տրանսֆորմացիայի վրա» թեմայով միջազգային համաժողովին:
Նախարարը, ողջունելով միջազգային համաժողովի մասնակիցներին, իր խոսքում հիմնական շեշտադրումը կատարել է սահմանադրական փոփոխությունների գիտական բաղադրիչի վրա. «Սահմանդրական փոփոխությունների գործընթացը և հատկապես այդ գործընթացի քննարկումները Հայաստանում ունեն երկու հիմնական բաղադրիչ՝ գիտաիրավական և քաղաքական: Այսօրվա համաժողովը նպատակ ունի խնդիրները քննարկել գիտական հարթակում: Իբրև կրթության և գիտության նախարար՝ ուրախ եմ փաստելու, որ Բրյուսովի անվան նախկին լեզվաբանական համալսարանը՝ ստանալով լեզվահասարակագիտական համալսարանի կարգավիճակ, նախաձեռնել է հասարակագիտական հետազոտություն և կազմակերպել գիտական համաժողով սահմանդրական բարեփոխումների վերաբերյալ՝ խնդիրը դիտարկելով երկրի սոցիալ-մշակութային, և հասարակական-քաղաքական զարգացումների համատեքստում: Սահմանադրական բարեփոխումների գիտական քննարկումները շատ «պոպուլյար» չեն, սակայն միաժամանակ ակնհայտ է, որ միայն գիտական քննարկումներն են ի զորու ապահովել գործընթացի խորքային վերլուծություն՝ ներկայացնելով սահմանադրությունների ազդեցությունը նորանկախ կամ հետկոմունիստական երկրների և հասարակությունների զարգացման վրա»,- իր ելույթում նշել է նախարար Ա. Աշոտյանը:
Միջազգային համաժողովին մասնակցել են ՀՀ ՍԴ նախագահ Գ. Հարությունյանը, Հայաստանում ԱՄՆ դեսպան Ջ. Հեֆերնը, 12 երկրներից հրավիրված փորձագետներ:
