Դեկտեմբերի 13-ին, կյանքի 90-րդ տարում երկարատեւ հիվանդությունից հետո վախճանվել է ճանաչված մտավորական, պետական, կուսակցական անվանի գործիչ Լյուդվիգ Պապիկի Ղարիբջանյանը: Իգդիրեցի հայտնի տոհմի շառավիղ Լյուդվիգ Ղարիբջանյանը ծնվել է 1922թ. օգոստոսի 24-ին Երեւանում բանվորի ընտանիքում:1945թ. ավարտել է Երեւանի պետական համալսարանի պատմության ֆակուլտետը: Արդեն ուսանող ժամանակ աչքի է ընկել ակտիվ հասարակական քաղաքական գործունեությամբ.1942-44թթ. եղել է ԵՊՀ արհկոմի նախագահը, 1944-47թթ. Երեւանի բժշկական ինստիտուտի կոմերիտական կազմակերպության քարտուղարը:
1947-48թթ. աշխատել է Հայաստանի ԼԿԵՄ Կիրովյան շրջկոմի, իսկ 1948-51թթ.` ՀԼԿԵՄ Երեւանի քաղկոմի առաջին քարտուղար:
1951-53թթ. կրկին աշխատել է Երեւանի պետական համալսարանում իբրեւ կուսակցական կոմիտեի քարտուղար, 1953թ.` ՀԿԿ Երեւանի քաղկոմի քարտուղար:
1954թ. ընտրվել է ՀԿԿ Երեւանի Սպանդարյանի շրջանային կոմիտեի առաջին քարտուղար:
1957-61թթ. Լ.Ղարիբջանյանը վերադառնում է ԵՊՀ կուսակցական կոմիտեի քարտուղարի պաշտոնի: 1961-66թթ. նա ՀԿԿ Երքաղկոմի երկրորդ քարտուղարն էր:
1966թ. փորձառու կազմակերպիչն ընտրվում է Հայաստանի կոմկուսի Երեւանի քաղկոմի առաջին քարտուղար, վարելով այդ պաշտոնը մինչեւ 1975թ. : Այդ տարիները նշանավորվեցին Հայաստանի մայրաքաղաքի բուռն զարգացմամբ: Կառուցապատվեց Նոր Նորքի բնակելի զանգվածը, վիթխարի ծավալների էր հասել բնակարանային շինարարությունը, վերելք էր ապրում Երեւանի արդյունաբերությունը, ողջ տնտեսությունը:
Լյուդվիգ Ղարիբջանյանը Էրեբունի-Երեւանի հիմնադրման 2750-ամյակի տոնակատարության նախաձեռնողներից ու կազմակերպիչներից էր: Նա մեծ ուշադրություն էր դարձնում քաղաքի բարեկարգման, կոմունալ տնտեսության, սոցիալական ոլորտի հարցերին:
1975-88թթ. Լյուդվիգ Ղարիբջանյանը Հայկական ԽՍՀ բարձրագույն եւ միջնակարգ մասնագիտական կրթության նախարարն էր: Նրա ղեկավարությամբ ու անմիջական մասնակցությամբ հիմնադրվել են մեր հանրապետությունում նորանոր բուհեր, ֆակուլտետներ, տասնյակ նոր մասնագիտություններ, զարգացել է բուհական ու միջնակարգ մասնագիտական հաստատությունների նյութատեխնիկական բազան: 1988-90թթ. աշխատել է ՀԽՍՀ Ժողովրդական կրթության նախարարի առաջին տեղակալ:
Ղեկավար պաշտոններին զուգընթաց Լյուդվիգ Ղարիբջանյանը վարել է գիտական բեղմնավոր գործունեություն: Նա Երեւանի պետական համալսարանի` մեր մայր բուհի նախանձախնդիր ու հետեւողական տարեգիրն էր, նրա գրչին են պատկանում ԵՊՀ պատմությանը, երկրի գլխավոր բուհի երախտավորների կյանքին եւ գործին վերաբերող բազմաթիվ մենագրություններ, այլ գրքեր, հարյուրավոր հոդվածներ ու հետազոտություններ: Ուստի պատահական չէ, որ, անցնելով կենսաթոշակի, նա հիմնադրեց ԵՊՀ պատմության թանգարանը, որը անմնացորդ նվիրումով ղեկավարեց երկար տարիներ:
Լյուդվիգ Ղարիբջանյանը ուներ նաեւ դասախոսական աշխատանքի հարուստ փորձ, անցնելով ճանապարհ ԵՊՀ ասիստենտից մինչեւ պրոֆեսոր:
Չնայած պատկառելի տարիքին՝ Լյուդվիգ Ղարիբջանյանը ստեղծեց ու երկար տարիներ ղեկավարեց Մոսկվայի ձեռներեցության ակադեմիայի Երեւանի մասնաճյուղը, շարունակելով իր մանկավարժական ու կազմակերպչական բեղմնավոր աշխատանքը:
Լյուդվիգ Ղարիբջանյանը 1966-79թթ. ընտրվել է ԽՍՀՄ Գերագույն խորհրդի, 1955-67թթ. եւ 1980-90թթ. Հայկական ԽՍՀ Գերագույն խորհրդի պատգամավոր:
Նրա ծառայությունները պետության ու ժողովրդի առջեւ գնահատվել են Մովսես Խորենացու մեդալով, Աշխատանքային կարմիր դրոշի 4 շքանշանով, Հայկական ԽՍՀ Գերագույն խորհրդի նախագահության մի շարք պատվոգրերով:
Տասնամյակներ շարունակ լինելով ղեկավար պաշտոններում՝ Լյուդվիգ Ղարիբջանյանը անփոփոխ պահեց իր մարդկային առաքինի կերպարը: Հանրահայտ էին նրա անմիջականությունը, ջերմությունն ու հոգատարությունը մարդկանց նկատմամբ:
Ազնիվ մարդու, ականավոր կազմակերպչի, հայրենասեր գործչի հիշատակն ու մնայուն գործերը ընդմիշտ կմնան ժամանակակիցների սրտերում, հանրապետության պատմության մեջ:
*Թաղման կառավարական հանձնաժողովը հայտնում է, որ Լյուդվիգ Ղարիբջանյանի հոգեհանգիստը տեղի կունենա դեկտեմբերի 15-ին ժամը 18.00-ին Կոնդի Սբ.Հովհաննես եկեղեցում: Հրաժեշտի արարողությունը ` Կոմիտասի անվան Կամերային երաժշտության տանը դեկտեմբերի 16-ին ժամը 12.00-14.00-ը, հուղարկավորությունը`ժամը 14.00-ին Երեւանի քաղաքային գերեզմանոցում:
